Vibrant Gujarat Global Investors Summit hawn a ni

Prime Minister Narendra Modi chuan nimin khan Gandhinagar-ah 7th Vibrant Gujarat Summit a hawng.

PM chuan hmasawnna tura theihtawp chhuah tura ngenin, summit a telna apianga thil langsar tak chu global economy chungchang a ni tih a sawi.

India rama awlsam zawka sumdawnna tih theihna tur kawng dap tiamin, PM chuan a kaihhruai sorkar chuan policy dik leh langtlang siam chu a tum zel dawn a ni, a ti. Modi chuan sorkarin a ngaih pawimawh ber chu hmasawnna awmze nei a nih thu a sawi bawk.

Hnathawh dan kalphung, work culture thlak danglam turin sorkar chuan kawng hrang hrangin hma a la tih a sawi a, institution-te tuaithar a ngaih thu a sawi. NDA sorkar chuan Planning Commission chu ṭhiatin, NITI Aayog tia thlak a nih thu a sawi.

Vibrant Gujarat Summit-ah hian Europe, Japan, Australia leh Canada aṭangin minister eng emaw zat an tel a, ramchhunga CEO 50 chuang bakah, international company aiawhte pawh an tel. UN Secretary General Ban Ki-moon leh US Secretary of State John Kerry te pawhin an telpui a ni.

Gujarat Chief Minister Anandiben Patel pawhin thu sawiin, India rama sumdawnna tih duhte tan Gujarat chu a kalka pawimawh tak pakhat a ni ta, a ti a, an state chu infrastructure ṭha tak nei mah se, port, road leh power lamahte hmasawnna tur tam tak a la awm a ni, a ti.

Summit-ah ram hrang hrangte inkara insumdawn tawnna chungchangah country-wise seminar bakah sector-wise seminar-te buatsaih a ni ang.

Reliance Industries Chairman Mukesh Ambani pawhin summit-ah hian thu sawiin, a company chuan thla 12-18 chhungin Gujarat-ah cheng vaibelchhe 100,000 hu investment a tih tur thu a puang a, heng te hi petrochemical production capacity tihlenna atan te leh 4G broadband service pekna atante hman a ni ang. Hei hi Make in India leh Digital India policy kalpuinaa an tha thawhna kawng khat a ni, a ti.