PM Modi leh Austrian Chancellor Nehammer inkawm

Prime minister Narendra Modi chuan Thawhlehni tlai khan Russia aṭangin ni hnih cham turin Austria a pan a, kum 40 chuang hnua India Prime Minister zingah Austria ram tlawhtu hmasa ber a ni. Nimin khan Austrian Chancellor Karl Nehammer nen inkawmin, ram pahnihte inlaichinna nghet leh zau zawk siam dan turte an sawi dun.

PM Modi hi Austrian foreign minister Alexander Schallenberg chuan airport-ah a lo hmuak a, Austria rama an lo lawm thu leh, Austria leh India chu inṭhianṭha tak an nih thute X-ah a post zui bawk. India leh Austria hian kum 75 chhung inlaichinna an lo nei tawh a ni. Austria hian kum 1947 khan India independence a pawmsak nghal a, 1955-ah India PM hmasa ber Jawarhalal Nehru chuan Austria ram hi a lo tlawh tawh a ni.

Modi-a zin hmaa India Prime Minister zinga Austria ram tlawh hnuhnung ber chu Indira Gandhi niin, kum 1983-ah khan a zin a ni. Kum 1984-ah Chancellor Fred Sinowatz chuan India a rawn tlawh ve bawk.

Prime Minister hian Nehammer bakah, Austria president Alexander Van der Bellen pawh a hmu bawk. Chancellor Nehammer nen hian India leh Austria-a business leader kalkhawmte hmaah thu an sawi bawk a ni. Modi hian nimin vek khan Vienna-ah India mi awmte a hmu bawk a ni. Austria-ah hian India mi 30,000 chuang an awm mek niin ministry of external affairs chuan a sawi a, an zinga a tam zawk chu Kerala leh Punjab aṭanga kal an ni. Zirlai 500 chuang an awm bawk.