SC-in SAA din ṭha lo state-te a vau

Supreme Court chuan specialised adoption agency (SAA) din tura hriattirna a lo tih chhuah tawh zawm ṭha lo state eng emaw zat an la awm tih sawiin, heng state-te hian August 30 hmaa a ṭul angte an tih fel hman loh chuan state chief secretary-te laka hma lakah a vau.

Additional solicitor general Aishwarya Bhati chuan kum 2023, November 20-a SC-in SAA din tura thupek a lo siam tawh chungchanga state hrang hrangte hma lak dan statistics tarlangin, district 370-ah SAA hi din a la ni lo tih a sawi.

State zinga an district awm zat aṭanga 50% aia tama SAA la din lohnate chu Delhi, UP, Punjan, Telangana, Gujarat, Haryana, Himachal Pradesh, Andhra Pradesh, Arunachal Pradesh, Jharkhand, Nagaland leh Uttarakhand-te an ni. He tih lai hian Goa, Karnataka, Rajasthan leh Kerala chuan SC-in district tina SAA din tura a tih chu an zawm tawh a ni, a ti.

Chief Justice of India DY Chandrachud leh justice pahnih - JB Pardiwala leh Manoj Misra te awmna bench chuan state-ten an thupek an zawm ṭha lo chu a vanduaithlak hle tih an sawi. "Thupek an zawm loh chuan hma kan la ngei ang tiin kan hrilh lawk vek bawk. Vawi tam tak an sawi hnuah SAA hi district tina din lo an la awm fo. August 30 hmaa thupek hi an zawm lo anih chuan, state chief secretary-te chuan Supreme Court-ah court thupek an zawm loh chhan an sawi fiah ngei a ngai ang," tiin an tarlang.

Fa atana nau lak (adoption) kalpui chungchangah court a inrawlh hnuah a buaipui chhung rei lutuk ṭhin chu a ziaawm phah tih Bhati chuan a sawi a, Central Adoption Resource Agency (CARA) kaltlangin kum 2019-20 khan fahrah naupang 3,745 chu fa atan lak an ni a, 2020-21 ah 3,559, 2021-22 ah 3,405, 2022-23 ah 3,441 leh 2023024 ah 4,029 an awm a ni.