State 7-a Assembly seat 13-ah by-election nei

Election Commission of India-in a lo ruat tawh angin, assembly by-election chu nimin khan state pasariha assembly seat 13-ah neih a ni.

By-election neihnate hi Bihar, West Bengal, Tamil Nadu, Madhya Pradesh, Uttarakhand, Punjab leh Himachal Pradesh-te an ni a, zing dar 7 aṭanga vote thlak ṭanin, zan dar 6 thleng hawn a ni. Lok Sabha inthlanpui neih hnua inthlan neih lehna hmasa ber a ni a, BJP kaihhruai NDA leh eptu pawl INDIA bloc bawk an inbitum leh ber. Lok Sabha inthlan neih zawh taka an beisei anga che ṭha lo, BJP tan pawh fiahna pawimawh tak a ni dawn a ni.

Hmun tam zawkah inthlan hi boruak ṭha tak hnuaiah neih a ni a, hetih lai hian assembly seat pali-a by-election neihna, West Bengal-ah chuan buaina chhuak a awm a, BJP polling agent pakhat in chu suasam a ni a, BJP panchayat worker in kut a tuar bawk nia sawi a ni. He thil thleng hi BJP hruaitute chuan Election Commission an hriattir nghal tih an sawi.