Hathras inpawngnekna thleng vangin official 6 suspend

Uttar Pradesh sorkar chuan July 2-a Hathras-a satsang (prayer meeting) neihnaa inpawngpekna thleng vanga mi 121 in nunna an chan chungchang chhuitu, special investigation team (SIT)-in report a theh luh hnuah official paruk a suspend nghal a, an zingah hian sub-divisional magistrate (SDM) pawh a tel.

SIT hian chief minister Yogi Adityanath hnenah an thil chhuina report hi theh lutin, inkhawmna hmuna inpawngnekna thleng chungchangah he inkhawm huaihawtute bakah tualchhunga official-te chu mawhphurtu an ni tiin an tarlang.

State sorkarin official a hremte hi Sikdanararau SDM, circle officer, SHO Sikandrarau, tehsildar bakah Kachora leh Pora police outpost in-charge te an ni. SIT report chuan heng official-te hian mi tam tak punkhawmna buatsaih tum chungchang hi an ngaihven ṭha tawk lo a, an hotu lu lam pawh an hriattir lo tiin, hrem ngei an phut niin a sawi. SDM hian an kalkawmna tur hmun pawh endik hmasa loin phalna a pe a, thuneitu sang lam pawh a be rawn lo a ni, an ti.

Satsang huaihawttute chu pungkhawm tur zat chhut thiam lo leh, phalna pek a nih dan pawh zawm loah an puh bawk. Hei bakah organising committee member ṭhenkhat chu police te laka che mawi loah an puh bawk. An thuhriltu ber, self-styed god Bhole Baba-in mipuite a hmuh laiin security lam engmah ruahman a ni lo a, hei hian buaina a belhchhah bawk niin an tarlang.