EC-in Delhi Assembly inthlan hun a puang

Election Commission of India chuan nimin khan Delhi Assembly inthlan neih hun tur a puang. February 7 ah vote thlak a ni ang a, February 10-ah vote tla te chhiarin result puan zui nghal a ni ang.

Kum 2013-a assembly inthlan neihah Arvind Kejriwal-a party din thar, Aam Aadmi Party (AAP) chu rin phak baka che

ṭhain, pawn lama Congress party puihna nen sorkar a siam a ni. Arvind Kejriwal chuan Delhi Chief Minister hna hi ni 49 a chelh hnuah nikum February 14 khan a bang a, hemi hnu hian Delhi hian chief minister a la nei leh lo a ni.

Party lian pathum- BJP, Congress leh Aam Aadmi Party te'n sorkar an siam theih loh thu an sawi avangin nikum November thla khan Delhi assembly hi ṭhiah a ni.

November thlaa assembly ṭhiah a nih hnu khan political party hrang hrangte chu inthlan neih tur atan an inbuatsaih ṭan nghal a ni. Kar kalta Inrinni khan BJP chuan election campaign bul ṭanna atan Prime Minister Narendra Modi chuan rally puitham tak a buatsaih a ni. Congress party pawhin party Campaign Committee for election hotu atan senior leader Ajay Maken a ruat tawh bawk. AAP pawhin Delhi mipuite chu an party mala sorkarna siam a, Kejriwal-a chu hun rei zawk CM a nih theihna tura hun pe turin a ngen.

Member 70 awmna, Delhi Assembly-ah hian 2013 inthlanah khan party mala seat la hnem ber BJP chuan seat 32 la mah se sorkarna siam thei tura member mamawh zat a nei pha lo a, a vawikhatna atana assembly inthlan chuhtu, AAP chuan seat 27 neiin kum 15 chhung zet sorkarna lo siam tawhtu Congress party chuan seat 8 chauh a la pha a ni.