Saradha scam: TMC hruaitu Mukul Roy thu zawhfiah tura koh a ni

Saradha Group-in investor-te sum tam tham tak a tihchingpen sak chung­chang chhuina kal zelah nimin khan Trinamool Congress national secretary leh railway minister hlui, Mukul Roy chuan Central Bureau of Investigation (CBI) chuan thu zawhfiah tura kohna a pe.

Kum 2014 December thla tir lam khan CBI hian Saradha sum tihchingpen kaihhnawihah West Bengal Transport Minister leh TMC hruaitu Madan Mitra chu CBI-te'n an lo man tawh bawk a ni.

Investor sum tihchingpen kaihhnawihah hian TMC MP pahnih, Srinjoy Bose leh Kunal Ghosh-te pawh man an lo ni tawh a, party vice president leh DG (armed police) hlui, Rajat Majumdar pawh jail-a dah a ni tawh bawk.

TMC second-in-command, Mukul Roy koh a nih chungchangah hian TMC chuan CBI chu na takin a sawisel nghal. West Bengal-a rorellai party, TMC chuan CBI chu Prime Minister Narendra Modi leh central-a rorellai BJP-in hmanruaah an hmang niin a puh. Party MP leh thupuangtu, Derek O'Brien chuan, "Verther taka politics khelhna hmanrua atana CBI hman chu BJP chuan a la chhunzawm zel a ni," tiin, "Lok Sabha inthlanpui neihah khan BJP hian West Bengal-ah min bei pha lo a, hei vang hian hmanraw bawlhhlawh tak hi a hmang ta a ni. Mahse an thiltih hi kan beilet zel dawn a ni," a ti.

Sorkar laipui chuan CBI chu regional party-te nekbehna hmanrua atana a hmang tia puhin TMC chuan, "State hrang hrangte duh dan ang ni loin an che a ni. TMC hi Parliament-ah eptu lamah a awm a, hei vang hian BJP chuan kan ka min hupsak tumin CBI hi a hmang a ni. Mahse an tum hi an hlawhtling dawn lo a, kan tlawm mai dawn lo," tiin a sawi.