Vibrant Gujarat Summit-ah MoU 18,000 chuang ziah a ni

Ghandhinagar, Gujarat-a Vibrant Gujarat Summit hman mekah nimin khan Memorandum of Understandings (MoU) 18,000 chuang, cheng vaibelchhe nuai 10 hu ziah a ni a, MoU dang 5000 dang pawh ziah leh tum a ni bawk.

Nithum awh tur, Vibrant Gujarat Summit hi Pathianni khan ṭan niin, Prime Minister Narendra Modi-a'n a hawng a, interanational leh national company CEO 50 chuang bakah, United Nations Secretary General Ban Ki-moon leh US Secretary of State John Kerry-te'n an hmanpui a ni.

Summit ni khatnaah hian Reliance Industries Limited chuan MoU cheng vaibelchhe 100,000 man a lo ziak tawh bawk a ni.

Nimina summit neihah hian US Secretary of State John Kerry chuan thu sawiin, India leh US chuan ram pahnihte inlaichinna ṭha a awm theihna turin investment tam tak an tih thu a sawi a, khawvela democracy ram upa ber leh democracy ram lian berte chuan inzawmna ṭha tak an nei a ni, a ti. Hemi rual hian economic lama inzawmna tilian tura tih tur tam tak a la awm thu te, hemi tana an thawh chhunzawm zel tur thu te a sawi. India rama US investment chu US dollar tluklehdingawn 2.4 aṭangin tluklehdingawn 28-ah a kai chho tawh niin a sawi bawk.

Kerry chuan January 26-a Republic Day parade neihna turah US President Barack Obama chu khuallian a ni dawn tih sawiin, khuallian tura sawm a ni chu President Obama chuan lawmawm a ti hle a ni, a ti. US sorkar chuan kumin kumtawp lama Paris-a climate change agreement siamfel a nih theihna turin India chu a thawhpui zel dawn tih sawiin, President Obama-a'n India ram a tlawh huna PM Modi nena an inkawm hunah pawh hemi chungchang hi an sawidun dawn tih a sawi.