Bajrang Dal activist-te'n Kristian building an suasam

Hindu sakhaw zuitute pawl pakhat, Bajrang Dal chuan Pathianni khan Bihar-a Jehanabad district-ah Kristian in pakhat an suasam a, a hnuah hun eng emaw chen National Highway an dang zui bawk. He thil thleng hian he district-a cheng, Kristiante a ti thlabar hle.

Police-te chuan Bajrang Dal activist-te hian Kristian Bhawan chu ṭawngṭaina hun an hman laiin an luhkhung a, furniture bakah hmanraw dang­te pawh an tihchhiatsak niin an sawi.

Bajrang Dal hian building chhungah hian sakhaw dang aṭanga Kristiana inlehtirna hun hman a nih vanga bei niin an insawi a, mahse Pastor Kamlesh chuan hetiang thil thleng hi a awm lo niin a sawi thung.

Pastor Kamlesh chuan, "Thil danglam engmah tih a awm lo a, Pathianni dang ang bawkin inchhung­ah hian ṭawngṭaina hun hman a ni a, hetihlai hian Bajrang Dal-te hi rawn lutin inchhunga awmte chu kut an rawn thlak zui ta a ni. Furniture-te pawh an suasam bawk," tiin a sawi.

Bajrang Dal te hian Kristian Bhawan chhung­a sakhua inlehtirna hun hman nia sawi an duh lohna lantir nan hian National Highway-83 chu hun eng emaw chen an dang zui a, police-te'n an hnawtdarh a ni. Police-te chuan Kristian zingah hliam tuar an awm niin an sawi.