Delhi-Varanasi inkarah bullet train tlantir dawn

India rama a pahnihna atan Bullet train chu Delhi-Varanasi inkarah tlan tir a ni dawn. Bullet Train hian km 782-a thui chu darkar hnih leh minute 40 chhungin a thleng hman tura ngaih a ni.

He project hi zawhfel a nih hun chuan Bullet train hian biakzinna khawpui a paltlang dawn a, he hi prime minister Narendra Modi-a Lok Sabha bial chhunga awm a ni a, Lucknow a paltlang bawk ang. Nakum khian Uttar Pradesh-ah hian inthlanpui neih a ni dawn a, mi ṭhenkhat chuan Modi-a campaign-na pakhat a nih thu an sawi. Delhi-Varanasi Bullet train hian Aligarh, Agra, Kanpur, Lucknow leh Sultanpur te a paltlang dawn a ni. Official chuan, "Interim report chu Spanish firm chuan a peihfel tawh a, high-speed rail corridor siam tur hian Railway Board-ah thlen a ni tawh a, final report chu November-ah peihfel hman beisei a ni" a ti. Report-a a lan dan chuan Delhi-Lucknow (km 506) chu darkar khat leh minute 45 chhungin a thleng hman dawn a, Delhi-Kolkata (km 1,513) chu darkar 4 leh minute 56 chhung tlan tura ngaih a ni. Delhi-Varanasi project atan hian cheng vaibelchhe 43,000 ruahman a ni a, Delhi-Kolkata atan hian vaibelchhe 84,000 ruahman a ni bawk.