UP-ah zu chhe in vangin mi 27 an thi

Uttar Pradesh-a district pahnihah zu chhe in vang­in mi 27 an thi a, mi 100 chuang damdawi-inah dah an ni bawk. Damdawi-ina enkawl zinga mi 10-te chu an dinhmun a ṭha lo hle. Zu chhe in enkawl mek zinga eng emaw zat hian khua an hmu thei lo.

Police-te chuan zu chhe in vanga vanduaina thlenna hi Unnao district, Hasanganj biala Talsarai khua leh, Lucknow-a Malihabad biala Kharta leh thingtlang khaw dang a nih thu an sawi. Zu chhe in zingah hian Malihabad khuaah mi 15, Lucknow-ah mi pali leh Unnao-ah mi pariat an thi tawh a ni.

Excise Commissioner Anil Garg chuan he thil thleng hi ngaihthah mai chi a nih loh thu a sawi a, he thil thleng kaihhnawihah hian an department-a thawk mi pasarih suspend nghalin, an zingah hian Malihabad biala excise inspector pawh a tel. Garg chuan Lucknow District Excise Officer Lal Bahadur Yadav-a chungah pawh action la turin a ti bawk.

IG (Law and Order) A Satish Ganesh chuan zu chhia hralhtu nia hriat mi panga-te lakah thubuai ziahluh a ni tawh a, an zinga pakhat, zu supply tu ber nia sawi Pyare Lal chu man a nih tawh thu a sawi.

Chief Medical Officer, SNS Yadav chuan zu chhe in zinga mi 100 chuang chu damdawi-in hrang hrangah enkawl mek an ni tih a sawi bawk.

BJP leh Congress party chuan thil dik lo titute chu man a, an chunga hremna lekkawh ngei turin sorkar an phut a, thi chhungte zangnadawmna pe turin an phut bawk.

Vanduaina thleng vang hian Thawhṭanni zan khan Chief Minister Akhilesh Yadav chuan high-level emergency meeting a ko nghal a, excise leh police department-a official 16-te suspend-na thupek pawh a tichhuak nghal.

State excise commis­sioner chuan an state chhung­a zu ṭha lo awm­te dap­chhuak turin state chhung hmun hrang hrang­a zu siamna leh hralhna hmunte dapchhuah hna an thawk zui dawn tih a sawi.