BJP in Maharaj-a hriattirna a pe

Central-a rorellai, BJP chuan an party MP Sakshi Maharaj-a'n Hindu sakhua venhim leh chawinun a nih zel theihna atana Hindu hmei­chhiate fa pali tal nei tura a tih chungchangah, nimin khan insawifiah tura hriattirna a pe.

Maharaj-a hnena hriattirna hi BJP President Amit Shah thu anga pek a nih thu leh, ni 10 chhung ngeia hrem a nih lohna tur chhan sawifiah tura hriattir a ni.

MP Maharaj-a thusawi hian sawisel a hlawh hle a, eptu lam pawhin an demna thu an sawichhuak. BJP chuan a MP thusawi hi a mimal ngaihdan a nih thu leh, party ngaihdan a nih loh thu a sawi a, an party member-te chu inhnialna chawk tho thei leh midang rilru ti na thei zawnga thu sawi insum turin a chah bawk.

Hetihlai hian Maharaj chuan party lam aṭangin insawifiah tura hriattirna a dawn lo thu a sawi thung. Maharaj chuan, "Hriattirna pek tih chungchang hi engmah ka hre lo. Party-in min pe a nih chuan ka office lamah a thleng ngei ang a, mahse hetiang engmah ka la dawng lo. Hei hi BJP chhung­kaw thil a ni a, media lam lo buaina tur a ni lo. Thil dik lo ka sawi a nih chuan, ka party chuan min hriattirin kei pawh ka insawifiah mai dawn a ni," a ti.