NITI Aayog Vice-Chairman Arvind Panagariya-a'n a hna a zawm

BJP kaihhruai NDA sorkarin Planning Commission ṭhiat a, a thlakna tura a din thar NITI Aayog Vice Chairman thar atana ruat, Arvind Panagariya chuan nimin aṭang khan a hna thar a zawm ta.

Panagariya hi NITI Aayog CEO Sindhushree Khullar leh senior official-te'n Aayog chung­chang an sawipui a, tlai lamah Aayog Chairman, Prime Minister Narendra Modi a hmu nghal.

Kumin January thla khan body din thar, Aayog-a Vice Chairman, full time member pahnih, ex-officio member (union minister) pali bakah special invitee pathum te hming chu puan a lo ni tawh a ni.

Vice Chairman atana Panagariya ruat a ni bakah hian PM chuan full time member atan economist Bibek Debroy leh DRDO hotu hlui VK Saraswat-te a ruat.

Panagariya hi kum 62 mi, Indian-American economist a ni a, Columbia University-ah Economics professor a ni ṭhin. Asian Development Bank-ah Chief Economist, Centre for International Economics, University of Maryland, College Park-ah Economics Professor a ni tawh bawk.