Sawilawk awm loin DRDO hotu lu ban a ni

Sorkar laipui chuan India top defence research organization, Defence Research and Development Organisation (DRDO) chairman, Avinash Chander chu Thawhlehni khan a ban. Chander hian a term hmang zo turin thla 15 hun a la nei a ni.

Prime Minister Narendra Modi kaihhruai cabinet panel chuan DRDO chairman atana contract-a chhawr, Chander rawihna titawp tura rawtna chu a pawm a, Thawhlehni khan an ban ta a ni.

India ram missile scientist ṭha ber zing a mi, long-range Agni series missile program a ho avanga 'Agni man' tia sawi, Chander hi ban a nih chhan official-a sawilan a ni lo. Chander thlaktu atan hian Bhabha Atomic Research Centre Director, Sekhar Basu chu dah a ni dawn nia sawi a ni.

Sawilawk loa DRDO hotu ban a nih hian scientist-te pawh a barakhaih hle a, mahse mi ṭhenkhat chuan PM Modi-a'n nikum August thlaa DRDO function neiha a lungawi lohna a sawi tawh avang khan he thil hi a thlen an lo rinlawk thu an sawi. PM chuan, "India hian talent pool a nei lo a ni lo a, mahse ngaihtuah tawk loh vang a ni," tiin a sawi a, DRDO chu hemi chungchangah hian ṭan lo a, khawvel huapa lang tura hmachhawp siam turin a lo ti tawh a ni.

DRDO project tam tak- Light Combat Aircraft Tejas, Nag missile, long-range surface-to-air missile project leh Airborne Early Warning and Control System project-te chu kum tam tak tihkhawtlai an ni tawh a, sum eng emaw zat senral a ni tawh bawk.

Defence Minister Manohar Parrikar chuan DRDO hotu ban tur hian rawtna a thlen niin nimin khan a sawi a, DRDO hotu hna chu hna pawimawh tak a nih avangin contract-a chhawr ni lo, kum la naupang zawk in chelh se a duh thu a sawi. Parrikar chuan, "Chander-a term hi November thla khan a tawp tawh a, hemi hnu hian contract-a chhawr zui a ni," a ti.

Kum 64 mi, Chander hi November 30, 2014-ah a pension tawh a, mahse kum 2013-a appointment order tihchhuah angin kum 2016, May 31 thleng contract a la nei a ni. Nikum November 27 khan sorkar laipui pawhin Chander chu thla 18 chhung a hna thawh chhunzawm tir a nih tur thu, thuchhuah siamin a lo sawi tawh bawk.