PDP-in NC rawtna a hnawl
Nikum December thlaa assembly inthlan neihna, Jammu and Kashmir-ah sorkar siam thei an awm loh avangin Governor's Rule puan a ni tawh a, party hrang hrangte chuan ṭangrual sorkar siam dan kawng an la zawng mek.
Chief Minister hlui leh National Conference hotu, Omar Abdullah-a'n thawhho rawtna a siam chu People's Democratic Party (PDP) chuan an hnawl tih sawiin, J&K mipuite chuan roreltu thlak danglam an duh avangin NC hi an thawhpui thei lo tih an sawi.
PDP thupuangtu Naeem Akhtar chuan Omar Abdullah-a'n sorkar siam anih mai loh avangin an state chhung dinhmun a nghet lo nia a sawi chu mipui thluak a suk sakna mai a ni a ti a, "NC nena thawhdun ai chuan Governor's Rule hnuaia awm pawh hi a la ṭha zawk a ni. Mipuite chuan inthlak danglam an duh a, hei vang hian National Conference pawh an paihthla a ni. NC hi thuneihna chan duh party a ni a, Omar Abdullah-a thiltih dan pawh hi thutlukna dik lo siam tura nawrna a ni," a ti.
Assembly inthlan neih hnuhnung berah PDP hi party mala seat la hnem ber niin, member 87 awmna House-ah MLA 28 a nei a, seat 12 la tu Congress party chuan a thuphungin PDP hi thlawp a tum thu a sawi tawh bawk.