Delhi inthlan neih tur atan party-te'n ṭan an la

15th January, 2015

February 7-a Delhi Assembly inthlan neih tura chuh tumte tan nimin aṭang nomination paper thehluh theih hun hawn ṭan a ni ta.

Political party hrang hrangte chuan inthlan tur atan hian ṭan an la na nghal hle a, he inthlana inbei tur ber party liante chu BJP, AAP leh Congress te an ni.

Kar kalta Inrinni khan BJP chuan election campaign ṭanna atan rally puitham tak a lo buatsaih tawh a, Prime Minister Narendra Modi pawhin a telpui. Thawhlehni khan Congress party chuan Union Minister hlui, Ajay Maken chu campaign committee chairman atan a ruat bawk. Hetihlai hian Congress hruaitu, Buta Singh Arvinder Singh Lovely chuan BJP a zawm. Aam Aadmi Party (AAP) pawhin rally an huaihawt bawk.

Assembly inthlan hi February 7 hian neih a ni ang a, February 10-ah vote tla te chhiarin result puan nghal a ni ang.

Election Commission-in inthlan hun tur a puan hnuah district 9-a political party-te'n dan loa hoarding leh banner an tarte chu lakthlak beihpui neih nghal a ni. South district-ah chuan Delhi Prevention Defacement of Property Act 2007 hnuaiah political party te'n hoarding 603 leh banner 55 an tarte lak thlak a ni a, North Delhi lam bial hrang hrang aṭangin hoarding, poster leh banner 1063 lakthlak a ni bawk.

District Election Officer (north) Madhu Tevtia chuan, "Model Code of Conduct (MCC) bawhchhia an awm leh awm loh vil turin video viewing team, Flying Squad Team, Static Surveillance Team-te dah an ni," a ti.

Voter-te tana thil hriat tur pawimawhte inhriattirna atan DEO chuan Facebook page a siam a, vote thlakna tur Electronic Voting Machine (EVM) te pawh enfiah mek.

Inthlan a chuh tumte tana nomination paper thehluh theih hun ni hnuhnung ber chu January 21 a ni a, paper thehluhte hi January 22-ah enfiahin, candidate inhnukdawk duh tan tan January 24 thleng hun hawn a ni bawk.

January 5-a electoral roll tihchhuahah, Delhi Assembly chhungah hian vote nei mi 1,30,85,251 an awm a, mipa 72,60,633 leh hmeichhia 58,24,618 an ni. Assembly bial 70 awmin, polling booth 11,763 ah vote thlak a ni ang.