Loneitu pawl SKM-in nawrh huaihawt leh an tum

Loneitu pawl intelkawm, Samyukt Kisan Morcha (SKM) chuan an thil phut la tihhlawhtlin loh, Minimum Support Price (MSP) siam, loneitute loan ba ngaihdam leh thil dang an phut chungchanga sorkar laipui an nawrna chhunzawma nawrh huaihawt leh an tum tih nimin khan an puang. An thil phut chungchangah hian prime minister Narendra Modi leh Lok Sabha-a leader of opposition Rahul Gandhi hnenah memorandum an thehlut an tum bawk.

SKM hi kum 2020-21 a ram puma loneitu pawl hrang hrangte nawrh huaihawtnaa a khaipa ber kha a ni. Nilaini khan general body meeting neiin, nawrh chhunzawm leh chungchang hi an rel.

Thuchhuah siamin, 'General body chuan kum 2021, December 9-a sorkar laipuiin SKM te inremna min lo siampui tawh a taka kalpui tura phuta nawrh chhunzawm leh hi a rel a ni. He inremna siamah hian loneitute khawsak phung nghawng thil pawimawh tak tak te tarlan a ni a, Agriculture Department-a Secretary-in a hming a ziah hnan a ni," an ti.

MP zawng zawng hnenah pawh an thil phut chungchang hi an thehluh vek tur thu SKM hotu Hannan Mollah chuan a sawi, July 16-18 chhungin MP-te hi hmuh vek an tum a ni. August 9 'Quit India Day' chu "Corporates Quit India Day"-ah an hmang dawn tih sawiin, loneitute thlawpna lantirin ram chhung hmun hrang hrangah nawrh huaihawt tum a nih thu an sawi bawk.

SKM hi ram chhunga loneitute pawl intelkhawmna lian ber niin, kum 2020 November thlaa din a ni a, farmer union 40 an tel a ni. Loneitute hamṭhatna tura an thil phut hrang hrang nawrnaah pawh hma la tu leh, a thawm na ber a ni ṭhin. Nawrh an huaihawt leh tur thu hi sawi mah se a ni tak erawh an la puang lo.