Ram pahnih tlawha zin PM Modi-a'n Delhi a rawn thleng

Prime minister Narendra Modi chu Russia leh Austria ram a tlawh hnuah nimin zing khan New Delhi a rawn thleng.

Modi hi ram pahnih a tlawhah hian ni hnih ve ve chamin, Russia president Vladimir Putin leh Austria Chancellor Karl Nehammer te bakah, official dangte meeting a neihpui a, India mi awmte nen inkawm hona hun an hmang bawk. Russia hi Russia-Ukraine indona thlen hnua a tlawh lehna hmasa ber a ni a, Austria hi kum 41 chhunga India Prime Minister zinga tlawh hmasa ber a ni bawk.

Nimin zing khan PM Modi hian New Delhi-a Palam Airport a rawn thleng a, India a rawn kir hnu lawkah X-ah Austria a tlawh chungchang a rawn post nghal bawk a, India-Austria inawmna chu a ṭhat chhoh zel thu a sawi. Austria a tlawh hma hian Russia-ah a kal hmasa a, Thawhlehni khan India-Russia inlaichinna ṭha siam tura a hmalakna avangin President Putin chuan chawimawina, 'Order of St Andrew the Apostle' a lo hlan. Kum 2019 khan he chawimawina dawng tura thlan a nih thu hi an lo puang tawh a ni.