July 23 chawhma dar 11-ah union budget pharh leh dawn

Union finance minister Nirmala Sitharaman chuan July 23 hian Union Budget 2024-25 a pharh dawn a, hei hi BJP kaihhruai NDA term thumnaa budget pharh hmasak ber tur a ni.

Budget pharh hun hi chawhma dar 11 aṭangin ṭan a ni leh dawn a, platform hrang hrangah live-a pek chhuah a ni leh ang.

Union budget hi kum 1999 thleng khan tlai dar 5-ah pharh a ni ṭhin a, hei hi colonia era aṭanga an chhawm chhoh zel a ni. London leh India tana a hun hi a remchan kawp avangin, Britian sorkar khan hemi hun hi a thlang a ni. India-in zalenna a hmuh hnuah pawh tlai dar 5 hi hman chhunzawm zela ni a, mahse kum 1999-a Atal Bihari Vajpayee-a kaihhruai sorkara finance minister, Yaswant Sinha khan budget pharh hun hi chawhma dar 11-ah a sawn a ni. A hun sawn a duhna chhan pawimawh tak pahnih a awm a, chungte chu India chu British awpna hnuaiah a awm tawh lo a, London time zone a zawm ve zel a ngai tawh lo tiin, a pahnihnaah lawmaker leh official-ten budget zirchianna leh sawi hona hun tam zawk an neih a duh bawk.

Kum 1999, February 27 khan Yaswant Sinha chuan a vawi khatna atan chawhma dar 11-ah House-ah Union Budget a pharh ta a ni. Hemi hnu hian he hun hi hman chhunzawm a ni ta a, tun thlengin chawhma dar 11-ah zel pharh a ni ta a ni.

Union budget 2024 pharh tur chungchangah hian nimin khan prime minister Narendra Modi chuan top economist leh expert-te meeting neihpuiin an sawi ho. Meeting-ah hian finance minister Sitharaman pawh a tel.