J&K-ah inthlan buatsaih a ni ngei tur a ni : Omar Abdullah

National Conference (NC) vice president leh Jammu and Kashmir chief minister hlui, Omar Abdullah chuan J&K-ah firfiakte aia security force-te an chungnun zawk zia lantirna turin assembly inthlan buatsaih a ni thuai tur a ni, a ti.

Nimina Srinagar-a chanchin thar lakhawmtute a kawmnaah, Abdullah chuan J&K union territory-ah boruak a la pangngai lo tih sawiin, tun hnaiah Jammu bialah firfiakte pawikhawihna a thlen fo thu a sawi.

"Vantlang nun a la pangngai lo. Pawikhawihna thlen fotu firfiakte hmaa an kun duh anih chuan inthlan buatsaih suh se. Firfiakte aiin kan security force-te an chak zawk zia in lantir duh lo a nih chuan inthlan chu buatsaih suh u," a ti. Hemi rual hian sorkar chuan huaisenna a nei a nih chuan inthlan chu a buatsaih ngei ang, a ti zui bawk.

NC hruaitu chuan J&K tana special status pekna, Article 370 ṭhiah a nih chungchangah central-a BJP sorkar chu a bei zui bawk. 'BJP chuan Article 370 tihtawp a nih hunah J&K-a helna pawh a bo dawn niin an sawi a, mahse helna leh Article 370 hian inzawmna a nei lo" tiin tun thlengin Kashmir-ah hel ho chetna a la hluar reng a ni, a ti.