Union Minister Kum khat chhung Jail tang turin hrem

BJP hruaitu leh union minister nilai, Mukhtar Abbas Naqvi chu kum 2009-a model code of conduct a bawhchhiat chungchangah, Nilaini khan court chuan kum khat lung in tang turin a hrem.

Chief Justicial Magistrate-in minister of state for minority affairs and parliamentary affairs, Naqvi hremna tur thupek a tihchhuah hnu hian Rs 20,000 dahkhamin bail-a chhuahtir nghal a ni.

Kum 2009-a Uttar Pra­desh in­thlan neih dawn khan, Rampur-ah BJP chuan nawrh an huaihawt a, hemi kaihhnawihah hian Naqvi bakah midang 200 lakah police-te chuan thubuai an ziaklut. Naqvi chuan nawrh huaihawtnaah hian a tel ve loh thu a sawi a, court thu­tlukna hi court sang zawkah khinlet a tum thu a sawi. Naqvi bakah hian midang 18 pawh thiam loh chantir an ni bawk.

BJP hian Rampur-a an party hotu man a nih vang leh, an party motor man a nih avangin lungawi lohna an lantir a, hetih hunlai hi Lok Sabha inthlanpui neih tura inbuatsaih lai a nih avangin Model Code of Conduct hman a ni. Nawrh huaihawtte hian MCC an palzut bakah, police station-te an luhkhung bawk.

Judicial magistrate Manish Kumar chuan Naqvi hi IPC sections 143 (unlawful assembly), 341 (wrongful restraint) and 342 (wrongful confinement), Section 7 of Criminal Law Amendment Act and Section 144 of CrPC hnuaiah thiam loh a chantir.