CEC thar atan Brahma rawt a ni

Chief Election Commissioner, Veeravalli Sundaram Sampath chu nimin khan a term a tawp a, a thlak turin Election Commissioner zinga a senior ber HS Brahma chu rawt a ni.

CEC thar tura HS Brahma rawtna hi Prime Minister in a pawm hunah, President hnenah thawn leh a ni ang a, a ni hian CEC thar tur hi a ruat ang.

1975 batch IAS officer Andhra Pradesh cadre, Brahma (64) hi Assam mi a ni a, ram danpuiin CEC chelh thei chin kum bithliah a siam, kum 65 chu April 19 hian a tling dawn a, thla thum chhung CEC hna hi a chelh thei ang.

Brahma hi Election Commission-a a luh hma hian centre-ah Power Secretary a ni tawh a, kum 2010 August 25 khan Election Commissioner pathum zinga pakhat ni turin lakluh a ni. CEC atana ruat a nih chuan hmarchhak bial aṭanga he chanvo chelh thei pahnihna a ni dawn a, a hmain Meghalaya state a mi JM Lyngdoh chuan CEC hna a lo chelh tawh a ni.

CEC kalchhuak, VS Sampath hian he hna a chelh chhung­in Lok Sabha inthlanpui ṭum hnih leh state tinah assembly inthlan a buatsaih hman a ni. Kum 2009 March thla khan CEC hna hi zawmin, Ningani khan kum 65 a tlin tak avangin a hna hi a chelh chhunzawm thei tawh lo a ni. 1975 batch Andra Pradesh cadre officer, Sampath hian CEC hna a chelh hma hian district lianah district collector hna te chelhin, wing hrang hrangah a lo thawk kual tawh a ni. Centre-ah Rural Development leh Power Secretar-te a ni tawh bawk.

Sampath-a hnuaiah hian Election Commission chuan hmalakna thar eng emaw zat a siam hman a, heng zingah hian voter-te'n vote an thlak dawna an thlalak chuanna identity slip pek te, vote thlak hun darkar 11 chhung hawn te, Lok Sabha inthlanpui neih tawh zinga rei ber te, Indian Informaton Service officer-te awareness observer atan ruat te a tel. A hun chhung hian Lok Sabha inthlanpui neih tawha vote tlak ṭhat ber, 2014-a vote 66.4% tla a tawng a, Lok Sabha bial pasarih-ah Verifiable Voter Paper Audit Trail (VVPAT) hman a ni a, inthlan vuakvetah social media chu media law and regulations hmangin khuahkhirh a ni bawk.