Delhi Election: Congress in candidate list a tichhuak

February 7-a Delhi Assembly inthlan neih tur atan party hrang hrangte'n theih­tawpin ṭan an la mek a, nimin khan Congress party chuan assembly seat 70 awmna atana a candidate list pahnihna a tichhuak.

Congress party-in candidate list a tihchhuah thar­ah hian mi 25 hming tarlan a ni. Candidate hming tihchhuah zingah hian MP hlui Mahabal Mishra leh Speaker hlui Yoganand Shastri-te an tel. List pakhatna a lo tihchhuah tawhte nen Congress party hian candidate tur mi 49 hming a tichhuak tawh a ni.

BJP pawhin nimin khan campaign-na tura hma lak zel dan tur ngaihtuahin meeting a nei a, candidate list pawh tihchhuah thuai an tum thu an tarlang.

IPS officer hlui Kiran Bedi chuan nimin khan BJP a zawm a, Delhi-a BJP office-ah lakluh a ni. BJP President Amit Shah chuan Bedi hi assembly inthlanah an party ticket-in a ding nghal dawn tih a sawi nghal a, a dinna tur bial erawh a sawilang lo. Kiran Bedi chuan Prime Minister Narendra Modi-an ram a kaihhruai dan a hmuh aṭangin BJP zawm turin thu­tlukna a siam ta niin a sawi.

Kiran Bedi bakah hian actor Jaya Prada leh AAP hruaitu hlui Shazi Ilmi-te pawhin BJP zawm an tum bawk. Jaya Prada chuan BJP hruaitute nen an indawr mek tih a sawi. Ilmi pawhin thutlukna a la siam mai theih loh thu a sawi a, hemirual hian AAP dodal zawngin a campaign tur thu leh, AAP nihna dik tak pho­chhuah a tum tih a sawi.