RBI-in interest rate a tihniam

Reserve Bank of India chuan nimin khan repo interest rate chu 8% aṭangin basis point 0.25 in a tihniam a, repo rate thar hi 7.75% a ni a, hei hi kum 2013 May thla hnua a tihhniam ṭum khatna a ni.

Interest rate tihhniam a nih vang hian stock market lam a sang nghal a, Sensex-in point 600 chuang a hmuh belh a, Nifty pawh a hmaa a sanlai ber 8,450 aṭangin 2% in a sang bawk. Rupee hlutna pawh paisa 46 in a sang bawk a, thla khat chhunga a tawng san lai ber niin dollar khat leh cheng 61.72 a intluk.

RBI-in interest rate a tihhniam hi industry leh pawisa puktute'n an chhawr dawn a, consumer demand pawh a san phah hle. Repo rate tihhniam a nih tak avangin home leh auto loan pawh a tlawm phah beisei a ni bawk.

Finance Minister Arun Jaitley chuan RBI in interest rate a tihniam chu lawmawm a tih thu a sawi a, hei hi Indian economy tan pawha thil ṭha tak a nih thu sawiin, investment cycle tuaitharna lamah pawh a ṭangkai dawn a ni, a ti. Deputy Finance Minister Jayant Sinha pawhin hun rei tak interest rate sang kalpui a nih hnuah tihhniam a ni ta chuan nghawng ṭha tak a neih a rin thu a sawi.

Sorkar leh business leader-te chuan RBI hi rate tihniam turin an lo nawr fo tawh a, mahse RBI governor Raghuram Rajan chuan thil man sang zel khuahkhirh chu a thil ngaih pawimawh hmasak a nih thu a lo sawi tawh thung.