MSG film clearance pek vangin Censor Board hotu a bang

Film Certification Appellate Tribunal (FCAT) in film sawisel hlawh tak, 'Messenger of God' hnena tihchhuah phalna a pek avanga lungawi lohna lantirin Central Board of Film Certification chairperson Leela Samson chu Ningani zan khan a nihna aṭangin a bang. 'Messenger of God' ah hian Dera Saacha Sauda hotu, Gurmeet Ram Rahim Singh a chang.

Leela Samson chuan FCAT-in MSG tihchhuah a phalsak nia media report chu a hriat thu sawiin, "Ziaka thu dah erawh a la awm lo. Hei hi Central Board of Film Certification zah lohna a ni a, ka banna hi ka thehlut ta a ni. I&B Secretary pawh ka hriattir tawh a ni," a ti.

A ban chhan an zawhah a hminghmera sawilan erawh a nei lo a, mahse Samson chuan ministry-in panel member atana a ruatte leh officer zingah eiru a awm avang te leh pawn lam mi inrawlh an awm ṭhin thu te a sawilang. Samson chuan, "Ministry-in member-te meeting neihna tur sum a neih tawh loh avanga thla kua zet inhmukhawm thei lo organization enkawl chu thil harsa tak a ni," a ti. Censor Board chairperson leh member-te term chu a tawp vek tawh a, mahse centre-a sorkar thar chuan member thar turte hi a ruat lo a, member ṭhenkhat term a pawhsei sak ringawt a ni, a ti.