Arvind Kejriwal-a nena inbitum ka duh: Kiran Bedi

Ningani-a BJP zawmtu, IPS officer hlui Kiran Bedi chuan February 7-a Delhi Assembly inthlan neih turah Aam Aadmi Party (AAP) hotu, Arvind Kejriwal chu a bial chhungah ngei bei let tur­in a inpeih tih a sawi a, a chak lo zawka a ṭang a nih pawhin pawi a tih loh thu a sawi.

BJP pawhin inthlan campaign-naah AAP hotu bei turin Kiran Bedi hi hmatheh berah an neih ngei rin a ni.

Kum 2011 thleng khan Bedi leh Kejriwal-te hi social activist Anna Hazare kaihhruaia eiruk dona kawngah an thawk dun a, mahse kum 2012-a Kejriwal-a'n Aam Aadmi Party a din hnu khan an thawhdunna hi a tawp a ni. Kerjiwal-a'n political party a din hi Anna Hazare leh Bedi-te hian an sawisel a, eirukna do tura an beihna chu politics nena inkaihhnawih lo tura an ngaih thu an sawi.

Kiran Bedi hian politics luhchilh a duhna chhan chu Prime Minister Narendra Modi-a kaihhruaina hnuaiah beiseina thar a neih vang tiin, tunhna hma lamin Modi hi na takin lo sawisel ṭhin mah se, "Kan nun chu a virvel a, a inthlak danglam leh fo ṭhin a ni a, ro a rel dan hi ka ngaisang a ni," a ti. Bedi hian BJP a zawm hma hian na takin BJP leh PM Modi hi a lo sawisel tawh ṭhin a, kum 2002-a Gujarat-a intualvuakna thleng chungchangah Modi hi a bei nasa hle.

BJP hruaitute chuan Kiran Bedi-in an party a zawm chu lawmawm an tih thu leh, an party tha a tihchak phah tur thu an sawi a, mahse BJP chief minister candidate tur leh Arvind Kejriwal-a khing turin dah a ni dawn em tih erawh an sawichiang lo.