No-fly zone puang tura US ngenna India-in a hnawl
United States of America (USA) chuan an ram President Barack Obama-a'n India Republic Day hmanpui tura a zin hunah, a lawmna neihna hmun Rajpath chu thlawhtheihna thlawh phal lohna bial, no-fly zone-a puang turin a ngen a, US sorkar ngenna hi sorkar laipui chuan a hnawl.
US Secret Service-te'n no-fly zone a puang tura a ngenna hi Republic Day lawmna peng pakhatah aircraft-te thlawh tir an nih dawn avangin a hnawlsak tih a sawi.
Kumin January 26-a Republic Day lawmnaah US President Barack Obama hi khuallian a ni dawn a, January 25 ah rawn thlengin January 27 thleng a cham ang.
Republic Day lawmnaah hian ramdang hruaitute chu khuallian atan sawm an ni ṭhin a, nikum khan Japan Prime Minister Shinzo Abe chu khuallian a ni. Nikum September thla khan Prime Minister Narendra Modi-a'n US a tlawh ṭumin President Obama hi khuallian atana a sawm a ni.
Obama rawn zin turah hian venhimna khauh taka kalpui a ni dawn a, Rajpath-a VVIP-te awmna chu thuah sariha ven a ni ang. An awmna zawn chunglam boruak pawh radar hmanga uluk taka vil reng a ni ang.
Kar kalṭa Zirtawpni khan US Secret Service chu India rama Obama a cham chhunga a kalna tur hmun leh kawngte endik turin an rawn kal tawh. Delhi khawpui chhunga CCTV 15,000 vel awmte endikna kawngah security mi leh sate an pui bawk ang.