Delhi Assemby: Political party-te'n Campaign bei ngawrh

February 7-a Delhi Assembly inthlan neih turah party hrang hrangte'n campaign an bei ngawrh tawh hle.

Tunhnaia BJP zawmtu, IPS officer hlui Kiran Bedi chu Congress chuan politics lama a thiltum tihhlawhtlin­na tura eirukna dotu, social activist Anna Hazae hmang ṭangkaiah a puh. Kiran Bedi chuan Congress puhna hi chhangin, "Hei hi ka nunphung a ni ve lo. Midang hman ṭangkai emaw, miin an hman emaw nih hi ka tum ngai lo a, ka ti ngai bawk lo. Thil ṭha nia ka hriat chu ka ti mai a ni," a ti. Kiran Bedi hi acitivist Anna Hazare-a'n eiruk dona tura Parliament-a Jan Lokpal Bill pass phuta nawrh a huaihawtnaah a phusa ber a ni ṭhin.

Aam Aadmi Party (AAP) hotu pawhin a thusawi chungchangah BJP-in complain a thehluh vangin Election Commission chuan insawifiah turin a hriattir bawk.

Kejriwal-a hian January 16-a press conference a neihah BJP chu Delhi khawpuiah chi leh chi inkara tharum thawhna thlentir tumah a puh a, hei hi Model Code of Conduct palzutna a ni tia complain thehluh a nih hnuah EC chuan January 20 tlai dar thum hma ngeia insawifiah turin a ti. Kejriwal-a hian Delhi khawpui chhunga Kristiante biak-in beih a nih chhanah BJP chu a mawhphurtuah a puh bawk.

AAP chuan tunhnaia BJP zawmtu, Kiran Bedi leh AAP hruaitu hlui Shazia Ilmi-te chu twitter hmangin a bei let a, Bedi leh Ilmi-te'n Prime Minister Naren­dra Modi, BJP leh Congress an sawi­chhiat­na thu post tawhte an pholansak leh.

Kum 2013, November 21 khan Ilmi hian fund chungchangah BJP leh Congress chu na taka sawiselin, a twitter ah BJP chu vertherna a ni, tiin a lo post a ni. Bedi pawh hian kum 2013 March 16 khan "Engtik niah emaw chuan Narendra Modi hian intualvuakna rapthlak thleng chungchang kha a la sawifiah ngei ang," a ti bawk. AAP hruaitute hian Kiran Bedi-in PM Modi, BJP leh Congress a sawichhiatna thu a post eng emaw zat an haichhuahsak a ni.