Censor Board member 10 an bang ve leh

Kar kalta Zirtawpni khan Censor Board Chairperson Leela Samson chu Dera Sacha Sauda sect hotu, Gurmeet Ram Rahim Singh channa, 'MSG-The Messenger of God' tihchhuah phalna pek anih vang leh eiruk duh lohna lantirin a nihna aṭangin a bang a, a ban tukah board member 10-te an bang ve leh.

Information and Broad­casting Minister Arun Jaitley chuan member bangte hi sawiselin, "UPA sorkar ruatte an ni," a ti a, eiruk chung­changah pawh anmahni chu mawhphurtu an ni, a ti.

'MSG-The Messenger of God' hi Ram Rahim-a ziah leh tihchhuah a ni a, amah hi a changtuah a ṭang bawk. Central Board of Film Certification (CBFC) leh revising committee aṭangin phalna engmah la hmu lo mah se, Film Certification Appellate Tribunal (FCAT) chuan tihchhuah phalna a pe a ni.

Central Board of Film Certification (CBFC) ah hian member 23 an awm a, Inrinni chawhma lam khan member 8-te chuan Minister of State for Infor­mation and Broadcasting Rajyavardhan Singh Rathore hnenah banna an thehlut a, zanah member dang pahnih an bang ve leh bawk. Banna lehkha an thehluhah, CBFC member-te hian sorkarin board a enkawl danah an lungawi loh thu an tarlang.