SC-in Kejriwal-a interim bail phalsak

Delhi excise policy kaihhnawiha Enforcement Diretorate (ED) in Delhi chief minister Arvind Kejriwal a man chungchangah, nimin khan Supreme Court chuan Kejriwal-a interim bail dilna a phalsak. Hetih lai hian Central Bureau of Investigation (CBI) in he policy kaihhnawihah vek hian eiruk thubuai siamsaka a man avangin jail aṭangin a la chhuak thei dawn chuang lo a ni.

Supreme court justice - Sanjiv Khanna leh Dipankar Datta awmna bench chuan interim bail a ngaihtuahnaah, thu inzawhfiah ngai ringawt chu in man chhan tur a ni lo tiin a phalsak a ni. Hemi rual hian Kerjiwal chu hetianga puhna hrang hrang a tawh mek avangin Chief Minister a nihna aṭanga ban mai chungchang pawh ngaihtuah turin an chah. Mahse court chuan mipui thlan hruaitute chu bang tura an hriattir ngawt theih loh thu justice Khanna chuan a sawi. Kejriwal hian thutlukna a siam chu a ṭha ber a ni, a ti.

Court hian Kejriwal hi interim bail vawi hnih a phalsakna a ni. A hmasa zawk chu May 10-ah khan niin, Aam Aadmi Party (AAP) national convener hi Lok Sabha inthlan tur atana a chhuah lailawk a lo phalsak a, inthlan zawh hnu June 2 khan Kejriwal hi thuneitute kutah a inpe leh nghal a ni.

AAP chuan SC-in Delhi Chief Minister interim bail a phalsak chu lawmawm an tih thu sawiin, BJP-in Kejriwal tihchhiat tumin an phiarru tih pawh a tichiang a ni, an ti. Supreme Court thutlukna chu thudikin hnehna a chanzia lantirtu niin AAP hruaitute chuan nimina press conference an neihah an sawi.

Supreme Court-in ED in case a siamsak chungchanga Kejriwal interim bail a phalsak lai hian, nimin vek khan Delhi Rouse Avenue Court chuan Delhi excise policy chungchanga information dik lo leh policy kalpui dan dik tawk loa puh a nih avangin judicial custody-a dah a nih hun chu July 25 thleng atan a pawhsei ve thung.