2060-ah India-a mihring tam ber hun thleng dawn

United Nations chuan India-a mihring awm zat chuan kum 2060 kum tir lamah a tam ber hun thleng chhoin, tluklehdingawn 1.7 dawn a tling ang a, hemi hnuah chuan 12% in a tlahniam tawh dawn niin a sawi. Heti chung hian tun kum zabi chhung chu India khawvel mihring tamna ber ram a la ni zel dawn tih a sawi nghal bawk.

World Population Prospect 2024 report, July 11-a tih chhuahah hemi chungchang hi tarlan a ni. Khawvel huapin mihring awm zat chu kum 5-60 chhung chu a la pun chhoh zel rin a ni a, kum 2080 kum laihawlah a peak hi thlengin, tld 10.3 vel a tling ang. Hei hi kumina khawvela mihring awm zat aiin 8.2% a la tam dawn a ni. A peak a thlen hnuah, mihring awm zat hi tlahniam chho zelin, kum zabi tawpah chuan tld 10.2 velah a tlak thlak rin a ni.

Kum 2023-a China khuma khawvela mihring tamna ber ram ni mek, India hian he dinhmun hi kum 2100 thleng a la chelh dawn a ni. Report-in a tarlan danin, kum 2024-a India rama mihring awm zat chu tld 1.45 ni a, kum 2054-ah tld 1.69-ah kaiin, hemi hnuah tlakhniam lam panin 2100-ah tld 1.5 vel awm turin an tarlang.

India dawta mihring tamna, China-ah chuan mihring awm zat hian tlakhniam lam a pan zel ang a, kum 2024-2054 inkara an tlakhniamna hi mtd 204 vel ni turin a chhut a ni a, anni dawtah Japan-a mihring awm zat pawh mtd 21 leh Russia-ah mtd 10 in a tlahniam dawn bawk a ni. Kum 2100-ah China hian tuna mihring awm zat zahve aia tam mah a hloh ang a, kum 1950 kumtawp lama mihring awm zat ang velah a tlahniam tawh dawn niin report chuan a tarlang.