Russia demna UNGA resolution-ah India-in vote thlak ve lo

UN General Assembly-in Russia-in Ukraine a rûn mek demna leh, Russia chu Ukraine a beihna titawp a, Zaporizhzhia nuclear power plant aṭanga a sipai hnukkir tura phutna resolution, Ningania a siamah India chuan vote a thlak ve lo.

UN member 193-ten UNGA resolution an ngaihtuahnaah hian, a thlawp zawngin member 99 in an vote a, a thlawp lo lamah vote pakua tlain, vote thlak lo member 60 an awm bawk. Vote thlak lo zingah hian India bakah Bangladesh, Bhutan, China, Egypt, Nepal, Pakistan, Saudi Arabia, South Africa leh Sri Lanka te an tel.

Russia demna resolution thlawp lo ram pakua zingah hian Belarus, Cuba, North Korea leh Syria an tel thung.

Resolution hi ‘Safety and security of nuclear facilities of Ukraine, including the Zaporizhzhia nuclear power plant' tih niin, Russia chu Ukraine a beihna titawp nghal tur leh, thu delhkilh awm loa Ukraine ram chhunga a sipai awm mekte chu hnukkir turin an phut a ni. Zaporizhzhia nuclear power plant aṭanga an sipaite an lak chhuah bakah, he plant hi Ukraine kuta hlan turin an phut bawk. He resolution hi Ukraine putluh niin, member ram 50 chuangin an sponsor a, an zingah hian France, Germany leh US pawh an tel a ni.