Delhi Assembly: Congress leh BJP-te'n Kerjiwal thusawi sawisel

Delhi Assembly inthlan inbuatsaihna kal zelah, Aam Aadmi Party (AAP) hruaitu Arvind Kejriwal-a chuan mipui­te chu BJP leh Congress party hnen aṭanga thamna sum la a, vote thlak huna AAP vote turin a ti.

Kejriwal chuan Pathiannia Uttam Nagar Assembly biala rally a neihnaah he thu hi a sawi. AAP hruaitu thusawi dan hi Congress party chuan na takin a sawisel a, Congress campaign committee hotu Ajay Maken chuan Kejriwal-a chuan thil dik lo ti turin mipuite a fuih a, hei hi mipuite hmusitna lantirna a ni tiin, thupha chawi turin a phut.

Maken chuan AAP hotu thusawi chu Model Code of Conduct palzutna lian tak a nih thu sawiin, Election Commission hnena an thlen tur thu a sawi. Maken chuan an party tana ṭhat zawk­na tur nia an ngaih avangin Delh unit President Arvinder Singh Lovely chu assemby inthlan turah hian in contest lo tura an ngen thu a sawi bawk.

Congress party hian nimin khan Kejriwal-a'n ni 49 chhung Delhi Chief Minister hna a chelh laia a thutiam a zawm leh theih loh hrang hrangte tarlanna booklet an tlangzarh. He booklet-ah hian Kejriwal-a thutiam, a zawm chhuah leh si loh 16 tarlan a ni a, a thutiam a ziahna affidavit copy pawh an dah tel. Kejriwal-a hian CM atana lakluh a nih dawn khan red beacon car hman loh te, CM bungalow luah lohte a tiam a, red beacon car hi hmang lo mah se a thawhpuite erawh chuan an hmang a, CM bungalow pawh hi a luah leh tho a ni. Amah vengtu tur pawh a mamawh dawn lo tih sawi mah se, a hnuah amah vengtu hi a dilbelh leh thung.

BJP pawhin Kejriwal hi an bei let nghal a, party MP Meenakshi Lekhi chuan, "Voter-te thamna sum leh zu an pekte la turin a fuih a, a thusawi danah hian Election Commission chu a hna tur thawk lo angin a lantir a ni," a ti.

Kejriwal hian Prime Minister Narendra Modi chu mimal takin a bei a,a lakah beiseina sang tak a neih laiin Ramlila Maidan-a a thusawi chuan a tihnual vek tih a sawi. "PM chuan a thusawi hun zahve zet chu Naxal anga min chhuah a tumna leh, nawrh ka huaihawt avanga min sawiselna atan a hmang a ni," a ti. Hetiang politics khelh chu thil ṭha lo a ni, a ti bawk. BJP chu inthlanpui neih dawna a thutiamte zawm lohah a puh a, "Hmasawnna chungchang an sawi ṭhin a, mahse hmasawnna thlentirna chu sakhaw inleh luihnaah an let ta zawk a ni," a ti.

IPS officer hlui, Kiran Bedi leh AAP hruaitu Shazia Ilmi-te'n BJP a zawm hnuah, nimin khan Congress hruaitu leh UPA minister hlui Krishna Tirath chuan BJP a zawm ve leh. Tirath chuan BJP a zawm thu hi sawichiangin, "Mipuite aiawhtu nia ka ngaih avangin ka zawm a, ka awm dan tur chu BJP central hruaitute'n an rel ang," a ti. Tirath hian nimin zing khan BJP President, Amit Shah chu a chenna inah a hmu tih a sawi bawk.

Assembly seat 70 awmna, Delhi Assembly inthlan hi February 7 hian neih a ni dawn a, February 10-ah vote tlate chhiarin, result puan nghal a ni ang. Inthlana chuh tumte tan Jnauary 22 thleng nomination paper thehluh theih a ni. Congress party chuan candidate list eng emaw zat a tichhuak tawh a, party lian dangte erawh chuan an la tichhuak lo.