PMO website lem siamtu an man

Delhi Police hnuaia Delhi Crime Branch chuan Prime Minister Office (PMO) website lem, 'Pradhan Mantri Adarsh Yojna' tia hming vuaha website siamtu chu chhui­chhuakin an man.

He website hian sumdawngte hnena loan pekna tur a siam a, loan la turte chu pawisa deposit hmasa turin a ti bawk. Webiste hi West Bengal-a Howrah aṭangin enkawl a ni a, call centre leh telephone caller 17 a awm tel. Website enkawltute hian government rubber stamp leh project report lemte an dah tel a, an website kaltlang hian mi 200 vel an lo bum hman a ni.

Delhi Police-te chuan website lem siamnaa a bultumtu ber leh a enkawltu, Sudipta Chatterjee chu Pathianni khan an man a, Chatterjee hian domain dang, bharat-sarkar.in, govindia.in, CGTMSE-govt.in. leh sorkar email lemte a lo siam bawk.

PMO chuan IT Department-a Cyber Security Cell hnenah fake account-te block vek turin a lo ngen tawh bawk.