BJP CM candidate atan Kiran Bedi

BJP chuan an party-a lut thar, IPS officer hlui Kiran Bedi chu Delhi Assembly inthlan neih turah an party Chief Minister candidate atan a puang.

Delhi Assembly inthlan hi February 7 hian neih a ni dawn a, February 10 ah vote chhiarin result puan nghal a ni ang.

BJP chuan CM candidate tur a puan rual hian assembly bial 70 zinga bial 62-a an party candidate tur list pawh a tichhuak nghal bawk.

Thawhṭanni zan khan BJP Parliamentary Board leh Central election Committee chuan meeting neiin, hetah hian member-te chuan kum 65 mi, Bedi chu party CM candidate atan hian lungrual takin an pawm a ni.

BJP president Amit Shah chuan Bedi-i kaih­hruaina hnuaiah hian an party chuan inthlan hi an hmachhawn dawn tih a sawi. Bedi dinna tur bial hi tihfel nghal a ni a, BJP ṭhatna bial, East Delhi-a Krishna Nagar bialah a ding ang.

Meeting-ah hian Prime Minister Narendra Modi, Home Minister Rajnath Singh, Finance Minister Arun Jaitley leh External Affairs Minister Sushma Swaraj-te pawh an tel.

Shah chuan, "BJP Parliamentary board-in Kiran Bedi hi Delhi Assembly inthlan lo awm turah BJP Chief Minister candidate turin a ruat a ni. Police officer a nih lai pawhin Delhi mipuite'n an ring em em a, eirukna leh pawikhawih dona kawng­ah pawh a hming hian hriat a hlawh tawh hle a ni," a ti. Kiran Bedi chuan Delhi mipuite beiseina a tihhlawhtlin sak theih ngei a rin thu leh, inthlan­ah pawh BJP chu a chakpui ngei a rin thu a sawi.

BJP in candidate list a tihchhuahte hi party General Secretary leh Union Minister JP Nadda-a'n a puang a, candidate zingah hian Thawhṭannia BJP zawmtu, Congress hruaitu leh Union Minister hlui Krishna Tirath-i pawh a tel a, Patel Nagar (SC) seat-ah a ding ang.

Nadda chuan inthlan­ah hian party Delhi unit president Satish Upadhyay chuan party enkawlna kawngah mawhphurhna tam tak a neih avangin inthlanah a chuh ve dawn lo tih a sawi.