Lawyer-te'n Obama dan tum

January 26-a Republic Day lawmnaa khuallian tur, US President Barack Obama chu ni 25-ah rawn thlengin, January 27 thleng a cham dawn a, a cham chhung hian Taj Mahal a kal theih loh nan Agra division hnuaia lawyer, 12,000 chuang te'n 'human wall' siama lo dan an tum.

Lawyer-te hian Parliament budget session neih leh hunah Agra-a Allahabad high court bench siamna tur telh an phut a, Prime Minister Narendra Modi chu an thil phut chungchanga thutlukna siam turin January 25 thleng hun an pe bawk. Huntiam chhunga PM-in chhanna a pek theih loh chuan US President dan an tumna hi kaltlangpui ngei an tum tih an sawi.

Action committee convener, KD Sharma chuan, "Agra bench din phutna hi district 14 chuanga advocate-te'n an thlawp vek," a ti.

Lawyer-te hian thla hnih chuang zet Agra bench siam phuta nawrh huaihawtin, hna pawh an thawk tawh lo a ni.