Kejriwal-a'n public debate neihpuiah Bedi a cho

Aam Aadmi Party (AAP) hotu Arvind Kejriwal-a chuan BJP Chief Minister candidate Kiran Bedi-i chu darkar hnih awh tur public debate neihpuiah a cho.

Kiran Bedi chuan Kejriwal-a'n vantlang hmaa debate neihpui tura a chona hi a chhang let lo a, assembly-ah zawk debate hi ala neihpui dawn tih a sawi. Bedi chuan, "Arvind hian debate ringawt hi a buaipui a, kei chu a taka hna thawhah ka innghat zawk a ni. Debate hi Assembly House-ah a la thleng zawk ang," a ti.

Thawhṭanni zana BJP-in an party CM candidate atan an party zawm thartu, Kiran Bedi an thlang tih an puan hnuah, Kejriwal-a chuan a Twitter aṭangin a lawmpui thu a sawi a, "BJP CM candidate atana thlan i ni hi ka lawmpui che. Neutral lamin an huaihawtna hnuaiah public debate, TV channel zawng zawngte'n an tihchhuah tur min neihpui turin ka sawm nghal a che," a ti. Hemi hnu hian Bedi-in a duhna hmun a thlanah public debate, darkar hnih awh tur buatsaih a duh thu a sawi bawk.

Kejriwal-a chuan, "Hei hi democracy tana thil ṭha tak tur a ni. Candidate-te chuan tualchhung kaihhnawih thil chungchangah debate neiin, mipuite'n duh­thlanna an lo siam theihna turin TV-ah tihchhuah a ni bawk tur a ni," a ti.

Congress party hruai­tu leh Delhi inthlan neih tur atana an party campaign committee hotu, Ajay Maken chuan party dang hruaitute chu debate neihpui turin a inpeih tih a sawi. Maken chuan vantlang hmuna debate buatsaih chu thil ṭha tak nia a ngaih thu sawiin, hruaitute chuan mipuite zawhna harsa leh khirh tak takte an chhan a ngaih dawn bakah, an hmathlirte pawh an puangchhuak thei dawn a ni, a ti. Hetiang dabate hi ṭum 2-4 buatsaih nise a duh thu a sawi bawk.