Kejriwal leh Bedi-in nomination paper an thehlut

February 7-a Delhi Assembly inthlan neih tur atan BJP chief minister candidate Kiran Bedi leh Aam Aadmi Party (AAP) hotu Arvind Kejriwal chuan nimin khan nomination paper an thehlut.

Inthlan neih tura chuh tumte tan nimin kha nomination paper thehluh theih hun hnuhnung ber a ni. Congress hruaitu Ajay Maken pawhin nimin vek khan nomination paper a thehlut bawk.

Nomination paper hi January 22 ah endik a ni ang a, candidate zinga inhnukdawk duhte tan January 24 thleng hun hawn a ni.

Arvind Kejriwal-a chuan nomination paper a thehluh hnu hian BJP hotu, Bedi chu inthlan hmaa public debate neihpuiah a cho leh. Hei bakah hian media lam chu Bedi-i buaipui lutukah puhin a sawisel tel nghal bawk. Kejriwal-a hian BJP CM candidate tur puan a nih hnu lawkah Bedi-i chu mipui vantlang hmaa debate neihpuiah a cho a, mahse Bedi hian chona hi a chhang let lo.

Kejriwal-a chuan kum 2013 inthlan neih dawna an agenda ngai bawk kha an hmang leh dawn tih a sawi a, "Eirukna umbo leh Delhi-a thil man sang zel tihreh chu kan hmachhawp lian ber a ni leh ang," a ti. Delhi mipuite chu inthlan hmasaa AAP an lo thlawp tawh anga thlawp chhunzawm leh turin a ngen nghal bawk.

Kiran Bedi chuan nomination a thehluh hma hian roadshow a nei a, hetah hian an party chu an chak ngei dawn, a ti. "Kan inlungrual a, tupawhin rampum huapa Modi-a sorkar siam ang a din an duh a ni. Delhi-a rorel turin tunge an duh tih chu mipuite duhthlanna a ni ta," a ti. Bedi hi Krishna Nagar bialah a ding dawn a, he bial hi BJP bial him niin, Union Minister Harsh Vardhan-a bial a ni.

Congress huraitu, Ajay Maken chuan AAP hotu Kejriwal leh BJP CM candidate Bedi chu an hlawkna tura remchang awm apiang um chingah puhin, eirukna doa beitu Anna Hazare chu politics-a an hlawkpui theihna tura hmang ve veah a puh.