Delhi CM nih tuma inbei turte mi hausa tawntaw vek an ni

Delhi Assembly inthlan, February 7-a neih tura political party lian te'n Chief Minister atan an hmatheh pathum, Arvind Kejriwal, Kiran Bedi leh Ajay Maken-te chu mi hausa tawntaw, crorepati vek an ni.

Chief Minister nih tuma bei mek mi pathum zingah hian Aam Aadmi Party (AAP) hotu, Arvind Kejriwal a rethei ber a, a thil neih zat belhkhawm hi cheng vaibel­chhe 2.09 hu a ni. Congress hruaitu Ajay Maken chu hausa berin cheng vaibelchhe 12.34 hu a nei a, BJP chief minister candidate Kiran Bedi chuan cheng vaibelchhe 11.65 a nei bawk.

Nomination paper an thehluh ruala affidavit an thehluha an tarlan danin, Delhi CM hlui Kejriwal leh a nupui hausakna hi nikuma Lok Sabha inthlanpui neih dawn aiin cheng nuai nga-in a tlem.

Kiran Bedi hausakna hi cheng vaibelchhe 11.65 hu a ni a, a thil neih zingah hian Dwarka, Delhi leh Gautam Buddh Nagar, UP-a flat pathum a tel. A flat pathum hlut zawng hi cheng vaibelchhe 6.05-a chhut a ni. Bedi pasal in cheng nuai 61.35 a nei bawk.

Congress hruaitu Maken leh a nupui thil neih chu cheng vaibelchhe 12.34 hu a ni a, nikuma Lok Sabha inthlanpui neih dawn aiin a letin an thil neih hlutzawng hi a pung a ni. An hausakna punna chhan hi Haryana leh Delhi-a an ram neih hlut zawng a pun nasat vang a ni a, heng ramte hlutzawng hi nikum khan cheng vaibelchhe 2.21 anga chhut a nih laiin, kuminah chuan cheng vaibelchhe 8.14-a chhut an ni thung.