India, Russia-in military program chak zawka kalpui an tum

India leh Russia chuan joint military program an siam chu chak zawka kalpui an tum a, heng zingah hian fifth-generation fighter aircraft (FGFA) project siamna tur pawh a tel. He project hi kum thum chhung chu a bahlah tawh a ni.

Nilaini khan Defence Minister Manohar Parrikar leh Russia Defence Minister Sergei Shoigu chuan New Delhi-ah meeting an nei a, hetah hian FGFA project bakah, thil dang tam taka thawhdunna pawh chak zawka kalpui a nih theih dante an sawidun. Minister-te hian project hi a hun bituka zawh an nih theihna turin a khat tawka inbiakna neih pawh an rel nghal bawk.

Parrikar chuan sorkar laipuiin 'Make in India' policy a siamah Russia armament company-te chu tel ve tura a duh thu Shoi­­gu a hrilh a, high-technology defence leh armament lamah pawh ram pahnihte'n thawhdun dan an zawng dawn a ni, a ti.

India leh Russia hian FGFA design, infrastruc­ture din leh fight testing neihna tur atan dollar tluk­leh­dingawn 5.5 ve ve an thawh ang. Single-seat fighter 127 hi Nashik-a Hin­dustan Aeronautics Ozar facility-ah siam a ni ang a, a pumpuiah India chuan FGFA project tan hian dollar tluklehding­awn 25 vel a seng ang.