Obama-a'n radio program a hmanpui dawn
Republic Day lawmna neih tura khuallian tur, US President Barack Obama chu India rama a cham chhungin Prime Minister Narendra Modi-a'n thla tina radio-a hun a hman, 'Maan ki Baat' (from the heart) program-ah a tel vel dawn.
'Mann ki Baat' Radio program hi January 27 hian neih a ni leh ang.
PM Modi chuan radio program an hman tur hi a hlawk thlak dawn hle tih a twitter-ah a tarlang a, mipuite'n chu he huna chhan tur zawhna an neihte chu hashtag, #AskObamaModi tih hmangin Pathianni thlenga post turin a sawm. Obama nena radio-a hun an hmang tur chu a phur tawh hle tih a sawi bawk. PM hian mipuite an zawhna an post theihna tur link pawh a dah nghal.
US President Barack Obama hi Pathianni hian India ram a rawn thleng ang a, a tuka Republic Day lawmnaah khuallian a ni ang. America President zingah Republic Day lawmnaa khuallian hmasa ber a ni ang.
January 27 hian President Obama hian South Delhi-a auditorium, mi 2,000 lenna hmunah thu a sawi dawn bawk a, hei bakah hian PM Modi nen CEO-te an kawm ang. Hemi hnu hian Agra-ah kalin Taj Mahal a tlawh nghal ang.