Kum 10 chhungin 24%-in Muslim an pung

Ramchhunga sakhaw hrang hrangte chhiarpui hnuhnung berah kum 2001-2011 chhunga Muslim punna chu 24% a ni a, kum 10 chhunga India rama Muslim awm zat chu 13.4% aṭangin 14.2% an tling tawh.

Census data tihchhuah hnuhnung bera Muslim punna hi kum 1991-2001 chhunga an punna aiin a la hniam a, mahse heti chung hian rampum huapa mihring punna 18% aiin a la sang hle.

Muslim pun chakna hmun hi Assam a ni a, kum 2001 khan Assam-a Muslim awm zat chu 30.9% a nih laiin, kum 10 hnuah 34.2% ah a kai hman.

Dan loa Bangladesh aṭanga lut an tamna dang, West Bengal-ah pawh Muslim awm zat hi an pung chak hle. Kum 2001-ah Muslim 25.2% an awm a, 2011-ah chuan 27% an tling.

Muslim pun chakna state dangte chu Kerala (24.7% to 26.6%), Goa (6.8% to 8.4%), Jammu & Kashmir (67% to 68.3%), Haryana (5.8% to 7%) leh Delhi (11.7% to 12.9%) te an ni.