Hri kai enkawl dam nuai 23 tling tawh

India ramah hripui kai nitinin nasa takin an pung mek a, chutih lai chuan enkawl dam pawh pung ve zel bawkin nimina Ministry of Health and Family Welfare report aṭanga a lan dan chuan hri kai dam leh nuai 23 chuang an awm tawh.

Nimin khan hri kai hmuh chhuah thar 61,408 lai an awm leh a, hei nen hian India ramah hri kai 31,06,348 an awm tawh a ni. Hetihlai hian darkar 24 chhungin dama puan mi 57,469 an awm leh bawk a, nimin thleng khan hri kai tawh dam leh 23,38,035 an awm tawh a ni. Hri vanga thi 836 awm lehin India ramah mi 57,542 laiin an thihpui tawh a, 7,10,771-in hri an la kai mek thung.

Enkawl dam tawh rate hi 75.27% a ni tawh a, thihpui rate hi 1.85% a ni bawk a, khawvela hri vanga thi rate hniam ber ram zingah India hi a tel a ni.

Indian Council of Medical Research chuan nimin khan Covid-19 sample 6,09,917 an endik leh tih report an tih­chhuahah an tarlang a, hei nen hian nimin thleng khan sample 3,59,02,137 an endik tawh a ni. 

Covid-19 endikna tura laboratory pawmpui pawh an neih belh zel a, nimina report an tihchhuah thleng khan 1520 nei tawhin heng zinga 984 hi sorkar laboratory a ni a, 536 chu private laboratory a ni ve thung. 

India ram khawpui Delhi-ah chuan darkar 24 chhungin hri kai hmuh chhuah thar 1,450 an awm a, hei hi August thla chhunga hri kai ni khata an hmuh chhuah tam ber a ni.

Delhi-ah hian hri kai 1,61,466 awm tawhin heng zinga 1,45,388 lai chu an dam leh tawh a, tunah hian hri kai mek 11,778 an la awm a, 4,300-in an thihpui tawh thung. Hri len ṭantirh lamah kha chuan Delhi hi hri hluarna ber zingah tel mah se, enkawl dam tawhte a sang a, hri kai hmuh chhuah pawh a tlahniam chak hle. State/UT zinga hri kai tam paruknaah an awm tawh a ni.  Chief Minister Arvind Kejriwal chuan Pathianni khan Metro rail service-te pawh chhunzawm a ni leh thuai tawh dawn tihte sawiin Delhi-ah hian hrileng hian ziaawm lam a pan chak hle a, nunphung pawh a pangngai chho leh viau tawh a ni.

Prime Minister Office chuan nimin khan Bihar-ah Covid-19 makeshift hospital pahnih, khum 500 ve ve awmna chu PM CARES Fund hmangin sak a ni dawn tih a sawi. 

PMO chuan hospital hi Patna leh Muzaffarpur-ah sak a ni dawn tih a sawi a, khum 500 ve ve awmin, ICU khum 125 ve ve siam a  ni ang, a ti. Hospital-a dcotor leh parmedical staff thawk turte chu Armed Force Medical Service lamin a pe dawn thung a ni.