2022 August-ah rel lei sang ber zawh hman tum

Jammu and Kashmir-a Reasi district hmuna khawvela rel lei (bridge) sang ber tur, Eiffel Tower aia metre 35 zeta sang tur 'Chenab bridge' dawh mek chu kum 2022 August-ah zawh hman tum a ni.

He lei hi Chenab lui chunga dawh a ni a, a san em avang hian hna thawh pawh a hautawk hle. Lei dawhna hmun hi lirnghin duhna hmun, seismic zone leh ramri bul a nih avangin a siam hna pawh an uluk hle a ni. Lirnghin duhna hmuna dawh a nih vang hian lirnghing richter scale 7 aia naah a che lo tura ngaih a ni. 

Finland leh Germany consultant-te design niin, Chenab lui aṭang metre 359 (1,178 ft)-a sanga dawh a ni a, lei sei zawng hi km 1.315 a ni. Lei hi Reasi district-a Bakkal leh Kauri inkara dawh a ni. He lei hi zawh fel a nih hunah chuan Katra aṭanga Srinagar zin hun chhung hi darkar 5-6 in a tlem phah ang. Lei dawhna project hi kum 2002 khan sorkar laipui chuan national project-ah a puang a, railway company, Konkan Railway Corporation Limited-in a thawk mek a ni.