Naktukah US President a rawn thleng dawn

Republic Day lawmnaa khuallian tur, US President Barack Obama chuan naktuk hian Delhi a rawn thleng dawn a, ni thum a cham ang. Obama hi US President zinga Republic Day lawmnaa khuallian hmasa ber a ni ang.

Obama hian Air Force One hmangin naktuk zing dar 4.45-ah Delhi International Airport a rawn thleng dawn a, chawhma dar 11.20-ah Prime Minister Narendra Modi nen Hyderabad House, Delhi-ah an inkawm ang.

Meeting an neih zawhah ram hruaitute hian joint press conference an nei zui ang, zan dar 7-ah Rashtrapati Bhavan-ah a pualin zanriah buatsaih sak a ni ang.

January 26, Republic Day lawmnaah khuallian niin, darkar hnih vel a hmanpui dawn a, tlai dar 3.45-ah Rashtrapati Bhavan-ah kalin President Pranab Mukherjee-a'n a lo dawngsawng ang. Tlai dar 5.45-ah US President hian PM Modi nen Maurya Sheraton-ah CEO-te meeting an neih pui leh dawn a ni.

A cham tawp ni, January 27 hian Agra-ah kalin Taj Mahal a tlawh dawn a, tlai dar 5.50-ah US panin a chhuak ang.

President Obama hi ITC Maurya hotel-ah a thleng dawn a, a thlenna hotel leh Republic Day lawmna tur, Rajpath inkar kawngte chu uluk taka enfiah reng an nih bakah, India Gate entry point-te pawh khar vek an ni a, venghimtute pawh thuah sariha dah an ni. Republic Day lawmna hmun a pannaah pawh a official car, 'The Beast' a hmang dawn nia report a ni bawk. Khualliante hi India President car hmangin Rajpath panpui an ni ṭhin a, mahse tun ṭumah chuan kalphung pangngai hi zawm a ni lo ang.