UP-ah zirlai hmeichhe tleirawlte training pe dawn

Uttar Pradesh sorkar chuan an state chhunga hmeichhe tleirawl, ClassX-XII zirlai 70,000 vel chu 'Power Angels' training a pe dawn.

Zirlai hmeichhia training pek turte hi state puma school 1,170 a mite an ni a, training pekte hian police identity card an dawng ang a, 'special police official' (SPO) tia vuah an ni ang. Heng hmeichhe tleirawlte hi mahni invenhim dan tur zirtir an nih bakah, a ṭul huna midangte ṭanpui dan turte pawh zirtir an ni ang.

He project hi kum 2013 khan duan a ni tawh a, kumin aṭangin a taka kalpui ṭan a ni dawn. School tinah form pek chhuah a ni a, training hi February thla tawp lam aṭangin ṭan theih beisei a ni.

He ruahmanna hi Chief Minister Akhilesh Yadav-a pet project, UP police 1090 Women Powerline peng pakhat a ni. Hei hi state chhunga hmeichhiate chunga pawikhawihna hluar zel beihletna atana ruahman a ni.

State sorkar chuan he scheme-a tel tur hian school tinte chu Class X-XII inkar section tinah hmeichhia 2-3 thlang turin a ti a, hengte hian police messenger anga awmin an pui ṭhin dawn a ni. 'Angel' thlan chhuahte hi kum nga chhung atana tih an ni. He scheme hi school bakah graduation leh post-graduation thlengin kalpui chhunzawm an tum.