Khaw 2,500-ah free wi-fi pekchhuah tum a ni

Sorkar laipui chuan kum thum chhungin ramchhunga khawpui, city leh town 2,500-ah high-speed wi-fi a thlawna pekchhuah hman a tum. Hemi atan hian cheng vaibelchhe 7,000 ruahman a ni a, he program hi Bharat Sanchar Nigam Ltd (BSNL) in a kalpui ang.

BSNL chairman leh managing director Anupam Shrivastava chuan, "Service hi fiscal year thar (2015-16) ah ṭanin, mobile operator zawng zawnga subscriber-te pawh huam tir vek tum a ni," a ti. A thlawna pek chhuah tur hi bithliah chin a awm dawn a, a hnuah chuan an chawi a ngai tawh ang.

Ruahmanna hi PM Narendra Modi-a kaihhruai sorkarin 'Digital India' program hmanga ramchhunga internet connectivity tihlen a tumna peng pakhat a ni. Finacial year ṭum li chhunga che ṭha lo tak leh, kum 2013-14 chhunga cheng vaibelchhe 7,000 hlohtu, BSNL pawhin a hlawkpui theih ngei rin a ni. Telecom Minister Ravi Shankar Prasad chuan BSNL leh MTNL thuamthar leh chu a ngaih pawimawh hmasak turah a lo telh tawh a ni.

BSNL CMD chuan wi-fi speed hi '4G level' a ni dawn tih a sawi a, wi-fi hotspot 50,000-60,000 siam a ni ang, a ti.