AYUSH secretary lakah action la turin ngen

Dravida Munnetra Kazhagam (DMK) leader leh Lok Sabha MP ni bawk Kanimozhi chuan AYUSH secretary Vaidya Rajesh Kotecha chu meeting-naah Hindi ṭawng thiam lo chhuak tura a tih avangin a chungah action la turin sorkar a ngen. 

Ministry of AYUSH meeting neihnaah AYUSH secretary Vaidya Rajesh Kotecha chuan Hindi ṭawng hmang thiam lote chu meeting-na aṭang hian chhuak mai turin a hrilh a ni. Hei vang hian DMK hotu Kanimozhi chuan AYUSH minister Shripad Naik hnenah AYUSH secretary lakah hian action la turin a ngen a ni.

Kanimozhi chuan India dana Eighth Schedule-a ṭawng 22 a awm thu sawiin, heng te hi official language an nih thu a sawi a, prime minister hlui Jawaharlal Nehru khan Hindi ṭawng thiam lo tan english chu hman zel a nih theih nan thu a lo tiam tawh a ni, a ti bawk. Hei bakah hian Kanimozhi chuan sorkar lakpuiin thil a huaihawta Hindi ṭawng hmannaah English-a ṭawnglettu dah turin a ngen bawk.