Obama vangin venhimna tihkhauh a ni

Vawiin-a Republic Day vawi 66-na lawmnaa khuallian tur, US President Barack Obama chu nimin khan Delhi a rawn thleng a, ni thum a cham ang. Obama hi a nupui Michelle Obama-in a ṭawiawm.

Prime Minister Narendra Modi chuan President Obama hi Palam airport-ah a lo hmuak a, Obama hian airport aṭang hian a thlenna tura ITC Maurya hotel a pan nghal a, chawhnu lamah amah lawmna Rashtrapati Bhavan-ah neih a ni. Rashtrapati Bhavan-ah hian President Pranab Mukherjee-a'n lo dawngsawngin, hun an hman zawhah Rajghat-ah kalin Mahatma Gandhi thlan­ah zahna pangpar a dah. Hemi hnu hian Prime Minister Modi nen Hyderabad House-ah chaw chhun eiin an inkawm zui nghal.

President Obama rawn kal dawn vang hian venhimna pawh ṭum dang zawng aiin tihkhauh a ni a, Delhi khawpui chhungah venhimna hi thuah sarih-a siam niin, security force 50,000 duty tir an ni a, an zingah hian US Secret Service Agent mi 500 an tel.

Vawiin bik atan no-fly zone pawh km 400 chinah zauh a ni a, hei hian Jaipur, Agra bakah Pakistan ramri bulte a tel.

Central Delhi-ah CCTV camera 15,000 dah a ni a, heng zingah hian high-definition license-plate recognition camera pawh eng emaw zat dah tel a ni. CCTV camera in thla a lakte hi central control room aṭangin vil reng a ni a, hei hi Delhi Police leh US Secret Service Agent-te'n an enkawl a ni.

Republic Day lawmna hmun tur, Rajpath leh Obama-te thlenna, ITC Mauyra Hotel inkarah US Navy Seals uifing, Belgian Malinois 20 chuang dah an ni bawk ang. President Obama thlenna hotel bul vela kawngpuite chu khar vek an ni tawh a, hotel bula forest area-ahte police ṭhahnem tham tak duty tir an ni.

Parade neihna tur, Rajpath-a lut turte endikna tur pawh chhawng thuma siam a ni a, police-te chuan a chhan sawifiah kher loin a ṭul nia an hriat chuan lut tumte chu an dang thei ang.

Kum danga Republic Day lawmnaa khualliante chuan parade neihna hmun hi President car in an pan ṭhin a, mahse kuminah chuan US President hian ama official vehicle, 'The Beast' chu a hmang dawn thung. The Beast hi Cadillac limousine niin, a bang hi inches riat-a chhah a ni a, a kawngkhar rih zawng hi Boeing 757 aircraft kawngkhar rih lam nen a in ang. Car darthlalang hi inches nga-a chhah niin, bulletproof a ni bawk. The Beast trunk-ah hian kangmei chhuak ṭhelhna hmanrua te, President blood type thisen, oxygen tank thlengin dah a ni.

Rajpath hi zone 13-ah ṭhenin, zone tin hi DCP rank officer kaih­hruai special team-in an veng dawn a, main stage ringawt pawh hi security mi 2,000 in an veng ang.