India-in ram pumah Republic Day vawi 66-na a lawm

India chuan nimin khan ram pumah Republic Day vawi 66-na a lawm a, a lawmna lian ber Delhi, Rajpath-a neihah President Pranab Mukherjee chuan India hnam puanzar pawtpharhin, parade contingent-te chibai a buk.

Republic Day lawmnaah hian ram venhimna lama India theihna lantir nan ralthuam hrang hrang te entir a nih bakah leh state hrang hrangte hnam thil, danglam tak tak chu tableau hmanga entir a ni bawk a, Union Ministry hrang hrang te'n programme lian tham an kalpuite tableau hmangin an tarlang bawk.

Republic Day lawmnaa khuallian US President Barack Obama chuan Prime Minister Narendra Modi nen Republic Day puala thiam thil hrang hrang entirte chu an lo thlir a, programme hman zawhah President Mukherjee-a'n Rashtrapathi Bhavan-a 'At Home' programme a buatsaihah an tel nghal.

Khuallian Obama hi nimin vek khan US-India Business Council-in inkhawm an buatsaihah PM Modi nen an tel bawk.

President Mukherjee chuan Rajpath-a Republic Day lawmnaah hian thuchah a sawi lo a, Pathianni tlai khan media kaltlangin a lo tarlang tawh a ni.

President Mukherjee chuan thuchah a sawiah India mipuite bakah Armed Forces, Paramilitary Forces leh Internal Security Forces te chu chibai a buk a, January 26 chuan India mipuite thinglungah hmun pawimawh tak a luah reng ang, a ti.

President chuan, "Pandit Jawaharlal Nehru, Sardar Patel, Subhash Chandra Bose, Bhagat Singh, Rabindranath Tagore, Subramanya Bharati leh mi dangte chu an hmalakna kawng danglam vek mah se ram hmangaihna chuan huang khatah a dah hlawm a, India ram tana beitute hi kan zalenna vangin kan chawimawi leh fak an phu a ni," tiin India ram tana beitu zawng zawngte kan nghilh lo a ni, a ti.

President Mukherjee chuan India danpui chu demo­cracy lehkhabu thianghlim a ni, tiin India socio-econo­mic dinhmun chawisanna atana min hruai­tu hmar arsi a ni, a ti. India ram chu hnam hrang hrangte lung­rual taka an chenna hmun a ni a, heng inlungrual­nate humhalh ngai a ni, a ti.

Nimina Republic Day lawmnaah hian President Mu­kherjee chuan India rama mi huaisen chawimawina sang ber, Ashok Chakra chu Major Mukund Varadarajan leh Naik Neeraj Kumar Singh hnenah a hlan. ipai pahnihte hi Jammu & Kashmir-a firfiak pawlte beihnaah nikum khan an thi a, an nupuite kutah chawimawina thilpek hlan a ni.